discrizzione
L’associu San Francescu d’Assisi di Merusaglia lancia una campgna di crowd funding cun per ughjettivu a reabilitazione di u cunventu di Rustinu, altissimu locu di a storia di a Corsica, in Merusaglia, paese nativu di Pasquale Paoli.
Quali simu?
Un assiciu creatu in 2016, u 19 d’Ottobre, chi hà per fine statutaria:
A “preservazione, rinovazione è messa in valore di l’inseme architetturale storicu di u cunventu di Rustinu cumprendendu u cunventu, a chjesa San Francescu d’Assisi, u campanile è a vicinanza; preservazione, rinuvazione è messa in valore di u nentru di a chjesa, di l’accunciamenti, di e stallazioni è di a mubiglia, in particulare l’organi; utilizà tutti i mezi necessariifinanzarii, culturali, ghjuridichi, tecnichi o altri per parvene à a fine”.
Perchè riabilità lu, u cunventu di Merusaglia?
Per l’associu hè prima per salvà un patrimoniu chi fù in a storia un teatru di a Corsica indipendente, di u Reame di Corsica fundatu da un figliu di u paese, Pasquale Paoli;
Di ritornu di Londra hè in stu cunventu ch’ell hà stabilitu u so guvernu u Gran’Pasquale. Hè dinu a sperenza di sente tornà chjuccà e campane in a valle.
Al dilà di mutivi propiu storichi o sentimentali, hè ancu una necessità ch’elli risentenu tutti l’abitenti di Rustini è di e pieve à l’ingiru chì Merusaglia – chì cumprende u paisolu di Ponte à a Leccia – hè u centru di parechje attività suciali, culturali o ecunomiche:
L’urganizazione cù a cumuna di u Quercitellu di a fiera annuale di a Bocca à u Pratu, l’ultima dumenica di Lugliu, visitata da millaie di corsi in vacanze o residenti.
A Paolina, corsa chì parcorre trà L’Isula Rossa è Merusaglia, u caminu seguitatu da e cennere di Pasquale Paoli rimpatriate ch’elle funu da Londra à a fin’di u seculu XIX. Centinaie di cuncurrenti venuti da tutta a Corsica è ancu da u Continente ci partecipeghjanu è tutti passanu davanti à u campanile, a chjesa è u cunventu.
I Fochi Paoli: un fucone nantu à a piazza à a chjesa addunisce più d’una millaia di persone è accade ch’elli fianu u viaghju brittanichi chì s’arricordanu. Parechji gruppi di cantadori corsi si pruducenu nantu à a scena stallata in a chjesa per st’evenimentu chì benefizieghja tutti l’anni d’una bella prisenza di e media
Ùn la ci allugheremu cù e numerose corse è parcorsi autumobili chì sceglienu di passà per Merusaglia.
Usu di Fondi
Una culletta, è par chì fà?
Reabilità l’inseme architetturale lasciatu da i Franciscani di u seculu XVII hè un cantieru pisivu è ùn serebbe realistu di finanzà nè mancu di cumencià tutti i travagli attempu.
L’Associu San Francescu hà sceltu di scumparte li in quattru operate:
Refezzione di u campanile chì per via di u so impiazzamentu è di a so altezza hè un munimentu assignalatu. Un primu estimu di i travagli hè di 200.000 € ma a simbolica di sta realizazione serebbe tramenda.
Refezzione di e pitture nentru à a chjesa. L’estimu pruvisoriu prisentatu da artisgiani corsi è taliani, pratichi di e tecniche tradiziunali.
Refezzione di l’organi cnì puru rustichi fermanu scarsi in Corsica è propiu tipichi di l’epica franciscana.
Refezzione prugressiva di u conventu per dà li un altru fiatu: parechje idee è prugetti sò à u studiu è à u dibattitu frà l’abitenti di a cumuna.
